《調教你MIRROR》琴晚嗰集大放洋蔥！導師梁祖堯安排自我認知課堂俾12位成員，透過四目交投同擁抱，化解成員之間嘅隔膜同芥蒂。
開始一對一攬攬嗰陣，好多成員都已經喊晒，包括AK同Jer，而AK更加向對方講咗句Sorry，兩人之間嘅誤會事源1月1號叱咤。
上年由AK、Anson Lo同Jer三子出solo，到1月1號派成績表，Jer拎到新人金獎，Anson Lo就拎銅獎。AK曾經喺訪問講過拎叱咤新人獎一直係佢等咗廿幾年嘅夢想，但最終空手而回，宣布金獎一刻佢難掩失落心情，就算Jer俾鼓勵佢都無乜反應，成為名場面「叱咤黑面事件」。之後AK同Jer種下心結，不過兩位都唔敢踏出一步化解誤會，直至今次攬攬同道歉，終於冰釋前嫌，感動到觀眾都跟住一齊喊。
三子競爭令佢地之間出現芥蒂，AK話：「Friend嘅自己溝通，唔friend嘅就選擇唔溝通，但我地係一隊嘅。到今日望住大家隻眼，發覺原來大家都唔係咁唔鍾意大家。我同阿Lo同Jer道歉之後，我舒服咗好多。我搵返自己，搵返大家，其實大家一直喺我心入面，只不過係我自己行開咗。」AK真情流露，直認自己性格任性同橫蠻無理，但今次好堅決為成員改變，為自己改變，希望做好副隊長去保護MIRROR。
Jer亦邊喊邊講返當時叱咤情況，原來當時佢同Anson Lo都糾結攞獎應唔應該開心：「叱咤由細睇到大，咁我應該開心，但我唔開心，因為我care我呢個兄弟，我同Anson Lo攞獎，但落台嗰陣，我同阿Lo講我地係咪應該要開心，我唔想因為呢個獎，唔想再有競爭，令到大家出現矛盾。」佢更透露有人建議佢當AK係工作伙伴，做完嘢唔洗理佢，唔夾咪唔夾，令注重兄弟情嘅阿Jer聽到有啲傷心。最後三子再互相攬攬同道歉，化解恩怨，無事喇！
Search